ប្រែសម្រួល៖រតនា

វ៉ាស៊ីនតោន៖ លោកប្រធានាធិបតី ដូណាល់ ត្រាំ បានដកអាជ្ញាបណ្ណសន្តិសុខពីលោក អេនថូនី ប្លីនកិន អតីតរដ្ឋមន្ត្រីការបរទេស និងលោក ចេក សូលលីវ៉ាន់ អតីតទីប្រឹក្សាសន្តិសុខជាតិ នេះបើយោងតាមមន្ត្រីសេតវិមានបានឱ្យដឹងកាលពីថ្ងៃសៅរ៍ (ថ្ងៃទី៨ ខែកុម្ភៈ)។

ការសម្រេចនេះធ្វើឡើងមួយថ្ងៃបន្ទាប់ពីលោកត្រាំបានប្រកាសដកអាជ្ញាបណ្ណសន្តិសុខពីអតីតប្រធានាធិបតី ចូ បៃដិន ដែលបានបញ្ឈប់ការទទួលបានរបាយការណ៍សន្តិសុខប្រចាំថ្ងៃរបស់លោក។

លោកត្រាំក៏បានដកអាជ្ញាបណ្ណសន្តិសុខពីលោកស្រី លីសា ម៉ូណាកូ អនុរដ្ឋអាជ្ញារបស់លោកបៃដិន ដែលបានជួយសម្របសម្រួលការឆ្លើយតបរបស់ក្រសួងយុត្តិធម៌ចំពោះការវាយប្រហារទៅលើវិមានកាពីតូលសហរដ្ឋអាមេរិក ដោយក្រុមគាំទ្រលោកត្រាំ កាលពីថ្ងៃទី៦ ខែមករា ឆ្នាំ២០២១ នេះបើយោងតាមមន្ត្រីបានឱ្យដឹងកាលពីថ្ងៃសៅរ៍។

មន្ត្រីទាំងនោះបានឱ្យដឹងថា លោកត្រាំក៏បានដកអាជ្ញាបណ្ណពីលោកស្រី លេទីសា ចេមស៍ អគ្គរដ្ឋអាជ្ញានៃរដ្ឋញូវយ៉ក និងលោក អាល់វិន ប្រាក អគ្គព្រះរាជអាជ្ញាម៉ានហាតធិន ដែលជាអ្នកដឹកនាំសំណុំរឿងប្រឆាំងនឹងលោកត្រាំផងដែរ។

ខណៈដែលការដកអាជ្ញាបណ្ណនេះប្រហែលជាមិនមានផលប៉ះពាល់ភ្លាមៗនោះទេ វាជាសញ្ញានៃការកើនឡើងនៃភាពបែកបាក់នៅក្នុងរដ្ឋធានីវ៉ាស៊ីនតោន។ អតីតប្រធានាធិបតីសហរដ្ឋអាមេរិកតាមប្រពៃណីតែងទទួលបានរបាយការណ៍សន្តិសុខ ដើម្បីអាចផ្តល់ដំបូន្មានដល់ប្រធានាធិបតីបច្ចុប្បន្នអំពីសន្តិសុខជាតិ និងគោលនយោបាយការបរទេស។

នៅឆ្នាំ២០២១ លោកបៃដិនបានដកអាជ្ញាបណ្ណសន្តិសុខពីលោកត្រាំ ដែលកាលនោះជាអតីតប្រធានាធិបតី។

លោក ភីត ហិកស៊ីត រដ្ឋមន្ត្រីការពារជាតិសហរដ្ឋអាមេរិក កាលពីខែមុនបានដកកងសន្តិសុខផ្ទាល់ខ្លួន និងអាជ្ញាបណ្ណសន្តិសុខពីលោក ម៉ាក មីលលី អតីតនាយទាហានថ្នាក់ហ្វូស្តារ និងជាអតីតប្រធានសេនាធិការរួម។

លោក មីលលី ដែលបានបម្រើការជាមន្ត្រីយោធាជាន់ខ្ពស់បំផុតរបស់សហរដ្ឋអាមេរិកក្នុងអំឡុងពេលខ្លះនៃអាណត្តិប្រធានាធិបតីដំបូងរបស់លោកត្រាំ បានក្លាយជាអ្នករិះគន់ដ៏សំខាន់ម្នាក់របស់លោក បន្ទាប់ពីចូលនិវត្តន៍ជានាយទាហានផ្កាយ4នៅឆ្នាំ២០២៣ ក្នុងរដ្ឋបាលរបស់លោកបៃដិន។

មន្ត្រីការទូតជាច្រើនរូបរបស់លោកបៃដិនបានធ្វើការជាមួយមន្ត្រីថ្មីរបស់លោកត្រាំក្នុងសប្តាហ៍មុនថ្ងៃទី២០ ខែមករា ពេលដែលលោកត្រាំចូលកាន់តំណែង លើបញ្ហានានារួមទាំងសង្គ្រាមរបស់រុស្ស៊ីនៅអ៊ុយក្រែន។

អ្នករាយការណ៍ព័ត៌មាននេះគឺនៅមិនអាចទាក់ទងលោក ប្លីនកិន បានភ្លាមៗដើម្បីបានឆ្លើយតបនោះនៅឡើយទេ៕

ប្រភព៖ Reuters/ac